खाद्य व्यवस्था तथा व्यापार कम्पनी लिमिटेडले पहिलोपटक जुम्लाको मार्सी धान खरिद गर्ने भएको छ । खाद्य व्यवस्था तथा व्यापार कम्पनी लिमिटेड जुम्लाका प्रमुख मोहन जोशीका अनुसार  जुम्लामा पहिलोपटक दुई सय क्विन्टल धानखरिद गर्न लागिएको हो ।  
जुम्लामा कुल दुई हजार नौ सय ५० हेक्टरमा धानखेती हुने गरेकोमा १२ सय हेक्टरमा मात्र मार्सी धानको खेती हुने गरेको कृषि विकास कार्यालय जुम्लाको तथ्यांक छ । जुम्लामा हिमाली भूभागमा धानखेती सिँचित क्षेत्रमा मात्रै गरिन्छ । यो अकासेपानीका भरमा मात्रै गरिँदैन । तिला र हिमा नदी हिमालबाट आउने हुन् र कृषकले पानी जमाइराख्छन् । प्रतिहेक्टर दुई टनसम्म सो धान फल्ने गरेको छ । 
प्रमुख जिल्ला अधिकारी रामबहादुर शाहीको अध्यक्षतामा स्थानीय खरिद समितिले प्रतिकेजी एक सय २० रुपैयाँमा मार्सी धान खरिद मूल्य तोकेको छ । जिल्ला कृषि विकास कार्यालय, कृषि अनुसन्धान केन्द्र, उद्योग, वाणिज्य संघ र स्थानीय चलनचल्तीमा रहेको मूल्य समायोजन गरेर धानको मूल्य तोकिएको खाद्य व्यवस्था तथा व्यापार कम्पनी लिमिटेड जुम्ला शाखाले जनाएको छ ।