नेपाल राष्ट्र बैंकले मंगलबार नेपाल राष्ट्र बैंक खुला बजार कारोबारसम्बन्धी कार्यविधि, ०७८ को सातौँ संशोधन गरेको 5 । अब स्वदेशी मुद्राको बचत र मुद्दती निक्षेपको ब्याजदर ३ प्रतिशतभन्दा कम भए बैंकहरूले स्थायी निक्षेप सुविधा लिन नपाउने भएका छन् । 

 अहिले राष्ट्र बैंकले ३ प्रतिशत ब्याज दिएर बैंकहरूलाई स्थायी निक्षेप सुविधा दिइरहेको छ । तर, अब बैंकहरूले त्यो सुविधा पाउन ग्राहकलाई स्वदेशी मुद्राको बचत र निक्षेपमा ३ प्रतिशतभन्दा बढी ब्याजदर दिएको हुनुपर्नेछ । त्योभन्दा कम भएमा यो सुविधा नपाउने राष्ट्र बैंकले जनाएको छ । 

‘स्वदेशी मुद्राको बचत र मुद्दती निक्षेपमा दिइने न्यूनतम ब्याजदर यो सुविधाको ब्याजदरभन्दा कम नभएको’ भन्दै संशोधित कार्यविधिमा उल्लेख गरिएको छ । ‘बैंकहरूले नाफा कमाउने नियमित कर्जा प्रवाहको ब्याजबाट हो । हामीले त राहत मात्रै दिएको हो । ग्राहकलाई ३ प्रतिशतभन्दा कम ब्याजदर दिने र राष्ट्र बैंकबाट ३ प्रतिशत ब्याज लिने भन्ने हुँदैन ।

तसर्थ, यस्तो सर्त राखेका हौँ,’ राष्ट्र बैंकका एक अधिकारीले बताए । कर्जाको माग नभएपछि बैंकहरूले पछिल्लो समय निरन्तर ब्याजदर घटाउँदै गएका छन् । थप ब्याजदर घटाउन नदिने उद्देश्यअनुसार पनि यस्तो सर्त तोकिएको राष्ट्र बैंकका अधिकारीहरू बताउँछन् । 

यद्यपि, बैंकहरूलाई प्रचलित कानुनअनुसार ब्याजदर परिवर्तन गर्न कुनै बाधा हुनेछैन । त्यस क्रममा स्वदेशी मुद्राको बचत र निक्षेपको ब्याजदर ३ प्रतिशतभन्दा तल गएमा बैंकहरूले स्थानीय निक्षेप सुविधा नपाउने राष्ट्र बैंकका एक अधिकारीले बताए ।