काठमाडौँ, १७ असार: नेपाल स्टक एक्सचेन्ज नेप्से परिसूचकमा आज बुधबार उच्च अङ्कको उत्साहजनक सुधार देखिएको छ। बजार बन्द हुँदा नेप्से परिसूचक ४४ दशमलव ५९ अङ्क अर्थात् १ दशमलव ७० प्रतिशतले बढेर २ हजार ६ सय ५२ दशमलव ९३ को बिन्दुमा पुगेको छ। यस वृद्धिसँगै दोस्रो बजारमा लगानीकर्ताको मनोबल थप बलियो बनेको देखिन्छ।

आज बजारमा कुल ९५ लाख ४७ हजार ६ सय ७८ कित्ता सेयर खरिदबिक्री भएका छन्। जसका माध्यमबाट कुल ३ अर्ब ८६ करोड ११ लाख ८३ हजार ४ सय १० रुपैयाँ बराबरको कारोबार भएको नेप्सेले जनाएको छ। मौद्रिक नीति पूर्वको बैंकहरूको सकारात्मक माग र बजारमा बढेको चहलपहलका कारण आज कारोबार रकम र परिसूचक दुवैमा राम्रो सुधार आएको हो।