रासस: न्युजिल्यान्डको मस्यौदा कानूनले पुरुष, महिलाको ‘जैविक’ परिभाषा खोज्ने न्युजिल्यान्डको सत्ता गठबन्धनको एउटा लोकप्रिय पार्टीले मङ्गलबार ‘क्यान्सरयुक्त सामाजिक इन्जिनियरिङ’ को विद्यमान ‘जागृत विचारधारा’ को निन्दा गर्दै पुरुष र महिलाको जैविक परिभाषा लागू गर्न कानून प्रस्ताव गरेको छ । ट्रान्सजेन्डर महिलाहरूलाई महिला शौचालय प्रयोग गर्न वा महिला खेलकुदमा भाग लिन प्रतिबन्ध लगाउन अभियान चलाएको न्युजिल्यान्ड फर्स्ट पार्टीले संसद्मा मस्यौदा कानून दर्ता गरेको बताएको छ । बेलायतको सर्वोच्च अदालतले महिलाको कानूनी परिभाषा जन्मको समयमा व्यक्तिको लिङ्गमा आधारित हुने फैसला गरेको एक हप्तापछि मात्र यस पार्टीले ‘जागृत विचारधारा’ विरुद्धको अभियान सुरु गरेको हो । पार्टीको नेतृत्व गर्ने उपप्रधानमन्त्री विन्स्टन पिटर्सले घरेलु र अन्तर्राष्ट्रिय घटनाहरूले ‘पेन्डुलम सामान्य ज्ञानतिर फर्किरहेको र हामी सही भएको प्रमाणित भइरहेको’ देखाउँछ भन्नुभयो । विधेयकले महिलालाई ‘वयस्क मानव जैविक महिला’ र पुरुषलाई ‘वयस्क मानव जैविक पुरुष’ का रूपमा परिभाषित गर्दछ । पिटर्सले एक विज्ञप्तिमा यसले देशलाई महिलाको सुरक्षा र संरक्षणलाई कमजोर पार्ने ‘जागृत विचारधारा’ बाट टाढा लैजाने बताउनुभयो । “कानूनमा यी परिभाषाहरूले समाजमा जागृत अल्पसङ्ख्यकद्वारा बढावा दिइएको क्यान्सरयुक्त सामाजिक इन्जिनियरिङ विरुद्ध लड्छन्”, उहाँले भन्नुभयो, “यस्तो कानूनको आवश्यकताले भ्रमित वामपन्थीले हामीलाई समाजका रूपमा कति टाढा लगेको छ भन्ने देखाउँछ । तर हामी फर्केर लड्दैछौँ ।” न्युजिल्यान्ड फर्स्ट तीन दलीय गठबन्धन सरकारको सबैभन्दा सानो सदस्य हो र यसले मस्यौदा कानून पारित गर्न समर्थन पाउनेछ भन्ने स्पष्ट छैन । यो विधेयक सरकारले नभई संसद्का एक सदस्यद्वारा पेस गरिएको थियो । संसद्ले यसमाथि छलफल गर्न समय छुट्याउने निश्चितता कम भएको देखाउँछ । केन्द्र–वामपन्थी विपक्षी नेता क्रिस हिप्किन्सले पिटर्सले समर्थन कायम राख्न ‘कुनै पनि लोकप्रियतावादी कारण’ अगाडि बढाइरहनुभएको बताउनुभयो । “उनीहरू एकपछि अर्को शीर्षकमा रुचि राख्छन्”, लेबर पार्टीका नेताले सार्वजनिक प्रसारणकर्ता रेडियो न्युजिल्यान्डलाई भन्नुभयो, “उनीहरूसँग वास्तवमै सुसङ्गत कार्यक्रम छैन र उनीहरू निश्चित रूपमा न्युजिल्यान्डलाई अगाडि बढाउन आवश्यक कुराहरूमा केन्द्रित छैनन् ।”