साझा अर्थ संवाददाता
काठमाडाैः इरान र अमेरिकाबीचको तनाव पुनः चरम बन्दै गएको छ। दुवै पक्षले एकअर्काका सैन्य र रणनीतिक लक्ष्यमा आक्रमण गरेका छन्। अमेरिकी सेनाले इरानका राडार र ड्रोन नियन्त्रण साइटमा हवाई आक्रमण गरेको पुष्टि गरेको छ भने इरानले अमेरिकी ड्रोन खसालेको र जवाफी कारबाही गरेको स्वीकार गरेको छ।
अमेरिकी सेन्ट्रल कमान्डका अनुसार शनिबार र आइतबार इरानको गेरुक सहर र केशम टापु आसपास लक्षित आक्रमण गरिएको हो। अमेरिकी लडाकू विमानले इरानी हवाई रक्षा प्रणाली, ग्राउन्ड कन्ट्रोल स्टेशन र दुई आक्रमण ड्रोन नष्ट गरेको दाबी गरिएको छ। यो कारबाही इरानले अन्तर्राष्ट्रिय जलक्षेत्रमा सञ्चालन गरिरहेको अमेरिकी एमक्यू–१ प्रिडेटर ड्रोन खसालेको घटनाको प्रतिक्रियामा गरिएको बताइएको छ।
इरानी रिभोलुसनरी गार्डले पनि जवाफी कारबाही गरेको जनाएको छ। इरानले एक टापुस्थित टेलिकम्युनिकेसन टावरमा आक्रमण भएको दाबी गरेको छ। दुवै पक्षले आ–आफ्नो कारबाहीलाई ‘जवाफी र आवश्यक’ भनी व्याख्या गरिरहेका छन्।
यसैबीच कुवेतले आफ्नो हवाई सुरक्षाले ड्रोन र क्षेप्यास्त्र आक्रमण रोक्न सफल भएको जनाएको छ। कुवेती अधिकारीहरूले सुरक्षा सतर्कता बढाइएको बताएका छन्।
क्षेत्रीय तनाव युद्धविरामको कमजोर अवस्थासँग जोडिएको देखिन्छ। इरानले विश्वको पाँचौँ हिस्सा तेल ढुवानी हुने रणनीतिक हर्मुज जलघाँटीमा आफ्नो नियन्त्रण कायम राखेको छ। उता इजरायल र हिजबुल्लाहबीचको तनाव पनि बढ्दो छ। इजरायलले लेबनानमा आफ्नो सैन्य कारबाही विस्तार गरिरहेको छ भने इरान समर्थित हिजबुल्लाहले इजरायलतर्फ ड्रोन आक्रमण जारी राखेको छ। यसले क्षेत्रीय अस्थिरता अझ गहिरो बनाएको छ।
