उद्योग, वाणिज्य तथा आपूर्तिमन्त्री दामोदर भण्डारीले दक्षिण एसियामा नेपाल लगानीका लागि प्रचुर सम्भावनाको क्षेत्र रहेकाले व्यक्तिगत मात्र नभएर सामुहिक तथा सस्थागत लगानी भित्र्याउने पहल गर्न  गैरआवासीय नेपालीलाई आग्रह गरेका छन् ।

शनिवार माल्टामा आयोजित गैरआवासीय नेपाली सङ्घ (एनआरएनए) को युरोपेली क्षेत्रीय सम्मेलन, २०२५ मा उनले लगानीको सुरक्षा र उपयुक्त वातावरण बनाउन सरकार तयार रहेको बताए । मन्त्री भण्डारीले भने– ‘नेपालमा कृषि, पर्यटन, उद्योगलगायत क्षेत्रमा लगानीका सरकारले वातावरण बनाएको र त्यसमा थप सहजीकरणका लागि सरकार तयार छ ।

मन्त्री भण्डारीले आफू मन्त्री भएपश्चात् नेपालमा व्यापार, व्यवसाय तथा उद्योगका क्षेत्रमा थुप्रै सकारात्मक एवं राम्रा काम गरेको उल्लेख गर्दै निर्धक्क भएर लगानीका लागि आग्रह गरे । सरकारले लगानीका लागि आवश्यक कानुनी संरचना बनाइसकेको र त्यसैमा टेकेर उद्योग, व्यापारलगायतका क्षेत्रमा पछिल्लो समय थुप्रै लगानी सुरु भइसकेको उनको भनाइ थियो ।

कार्यक्रममा एनआरएनए आइसीसीका महेश अधिकारी, लगानी बोर्ड नेपालका प्रमुख कार्यकारी निर्देशक सुशील ज्ञवाली मध्यस्थकर्ताका रूपमा रहेका थिए ।