दोलखाः माथिल्लो तामाकोशी जलविद्युत केन्द्रबाट पूर्ण क्षमतामा(४५६ मेघावाट) विद्युत उत्पादन हुन सुरु भएको छ । डिसेन्डर संचालनमा आएपछि पूर्ण क्षमतामा सञ्चालनमा आएको हो । 
क्षतिग्रस्त संरचना मर्मत गरेपछि बिहीबारबाट पूर्ण क्षमतामा विद्युत उत्पान सुरु गरिएको जलविद्युत केन्द्रले जानकारी दिएको छ । अविरल वर्षापछि तामाकोसी नदीमा आएको बाढीका कारण गत असोज ११ गते साँझदेखि माथिल्लो तामाकोसीको बाँधको सबै ढोका खोलेर उत्पादन बन्द गरेको थियो । विद्युत गृह बन्द गर्दा विद्युतगृह र सुरुङ सुरक्षित रहे पनि असोज १२ गते माथिबाट ठूलो पहिरो र लेदो आउँदा लामाबगरमा रहेको बालुवा थिग्राउने पोखरी (डिस्याण्डर) र भूमिगत नहरमा ठूलो क्षति पुग्न गएको थियो  ।
जलविद्युत केन्द्रका दुई डिस्याण्डरमध्ये कम क्षति भएको बायाँतर्फको डिस्याण्डर र भूमिगत कल्भर्ट पुनर्निनिर्माण गरेर गत पुसदेखि विद्युत गृह सञ्चालनमा ल्याइएको थियो । अहिले दुवै पोखरी दुरूस्त भएपछि पोखरीमा जम्मा भएको बालुवा सफा गर्न सहज भएको छ । 
कम क्षति भएको र हिउँदमा विद्युतको माग धान्न आपत्कालिन अवस्थामा रोल्वालिङ खोला जलविद्युत आयोजनाकै निर्माण कम्पनी हाइ हिमाल कन्ट्रक्सनमार्फत सफा गर्ने र मर्मतको काम गरेको थियो । तर बढी क्षति भएको दायाँ पोखरीको डिस्यान्डर पोखरी सार्वजनिक खरिद ऐनअनुसार ठेक्का आह्वान गरेर पुनर्निर्माण गरिएको हो ।