बुधबार उच्च उतारचढावबीच नेप्से परिसूचक ३.८ अङ्कले बढेर बन्द भएको छ ।

मध्यान्ह १२ बजेसम्म करिब ७५ अङ्कले बढिसकेको बजार अन्त्यमा भने केवल ३.८ अङ्कले बढेर २७८६.४ अङ्कको विन्दुमा बन्द भएको छ । आज १०९ कम्पनीको सेयरभाउमा वृद्धि हुँदा १९४ कम्पनीको सेयरभाउमा गिरावट आएको छ भने २२ कम्पनीको मूल्य स्थिर रहेको छ । अघिल्लो दिन उच्च अङ्कको गिरावट पछि सम्हालिन लागेको सेयरबजारमा मध्यान्हपछि विभिन्न राजनीतिक हल्ला चल्दा गिरावट हुन पुगेको लगानीकर्ताहरुले सामाजिक सञ्जालमा गुनासो गरेका छन् ।

आज कुल १३ अर्ब ७२ करोड ७३ लाख ६८ हजार ३९३ रुपैयाँ कारोबार हुँदा चन्दागिरी हिल्सको सबैभन्दा उच्च कारोबार भएको छ । बुधबार सर्वाधिक कमाउने कम्पनीमा लिवर्टी इनर्जी, हिमालयन हाइड्रोपावर, मिड सोलु हाइड्रोपावर, आत्मनिर्भर लघुवित्त, माइखोला हाइड्रो र पिपुल्स हाइड्रोपावर कम्पनी रहे । उक्त कम्पनीको सेयरभाउ १० प्रतिशत कै हाराहारीमा वृद्धि भयो ।

यसैगरी आज सर्वाधिक गुमाउनेतर्फ कर्णाली विकास बैंक, स्वरोजगार लघुवित्त र अप्पर सोलु हाइड्रो रहे । ती कम्पनीको सेयरभाउ ५ प्रतिशत भन्दा बढीले घट्यो । उपसूचकतर्फ लगानी समूहको उपसूचक सर्वाधिक १.०१ प्रतिशतले बढ्दा फाइनान्स उपसूचक सर्वाधिक १.६९ प्रतिशतले घट्यो ।