भारतको इनर्जी एक्सचेन्ज मार्केटले नेपाललाई रातको समयमा थप चार घण्टा बिजुली उपलब्ध गराएसँगै नेपालमा भारतबाट दिनको १५ घन्टा बिद्युत् आयात हुन थालेको  ।  भारतले बिहीबारबाट राति २ बजेदेखि बिहान ६ बजेसम्म ६ सय मेगावाटसम्म बिजुली दिन नेपाल विद्युत् प्राधिकरणलाई स्वीकृति दिएको हो । मे र जुनमा भारतले बिद्युत् दिनेछ भने त्यसपछि नेपालमा बर्खा शुरु हुने र आन्तरिक उत्पादन बढ्न थाल्ने छ ।  

भारतले विद्युत्मा कटौती गरेपछि नेपालको औद्योगिक क्षेत्रमा पनि विद्युत् आपूर्ति प्रभावित भएको थियो । अब औद्योगिक क्षेत्रमा विद्युत् आपूर्ति सुधार हुने प्राधिकरणको भनाइ छ । ‘नदी–नालाहरूमा बहाव बढेसँगै स्वदेशी उत्पादन बढेको छ । उत्पादनमा वृद्धि तथा भारतले मे १ देखि विद्युत् खरिदको समयावधि थप ४ घण्टा बढाई बिहान २ देखि बेलुका ५ बजेसम्म कायम गरेकाले हाल उद्योगमा भइरहेको विद्युत् कटौती कम हुने र औद्योगिक ग्राहकले मागअनुसारको विद्युत् पाउने भएका छन्,’ प्राधिकरणका कार्यकारी निर्देशक हितेन्द्रदेव शाक्यको सचिवालयले जारी गरेको प्रेस विज्ञप्तिमा उल्लेख छ ।