साझा अर्थ संवाददाता
१८ चैत २०८१, सोमवार
काठमाडौं । गत शुक्रबार भएको लुटपाटमा कोटेश्वरस्थित भाटभटेनी शाखामा ८० लाख रुपैयाँको क्षति भएको भाटभटेनीले जनाएको छ । यसअघि एक संचारमाध्यममा भाटभटेनी सुपरमार्केट्सका अध्यक्ष मिनबहादुर गुरुङले आफ्नो विचार राख्दै कुल क्षती ७५ देखि ८० करोड रुपैयाँ बराबरको भएको बताए पनि त्यो टङस्लिपका कारण भएको उनले जिकिर गरेका छन् ।
उनका अनुसार शुक्रबारको लुटपाटमा ६४ लाख ८८ हजार ३३७ रुपैयाँ बराबरको सामग्री लुटपाट भएको छ । राजावादी समूहले गरेको आन्दोलनमा उनीहरुका कार्यकर्ता प्रवेश गरेर भाटभटेनी तोडफोड गर्नुका साथै लुटपाट गरेका थिए ।
त्यसैगरी भाटभटेनीका बाहिरी भागमा रहेका धेरैजसो सिसा फुटेका छन् । भवनमा क्षति पुगेको छ । त्यसबापत ११ लाख ८५ हजार ८५५ रुपैयाँको क्षति भएको प्रारम्भिक अनुमान छ ।
त्यसैगरी दुई लाख ६५ हजार रुपैयाँका शो–केश तथा अन्य सामग्रीमा क्षति पुगेको छ । काउन्टरमा रहेका ९४ हजार रुपैयाँ पनि लुटपाट गरिएको भाटभटेनीले जानकारी दिएको छ ।
साझा अर्थ संवाददाता
