राजावादीले शुक्रबार काठमाडौंमा गरेको आन्दोलन हिंसात्मक भएको भन्दै निजी क्षेत्रले त्यसको भत्र्सना गर्दै क्षतिपुर्ति माग गरेको छ ।  नेपाल उद्योग वाणिज्य महासंघले विज्ञप्ति जारी गर्दै आन्दोलनबाट सर्वसाधारण एवं उद्यमी–व्यवसायीको सम्पत्तिमाथि भएको आक्रमण, लुटपाट, आगजनीलगायत गतिविधिप्रति गम्भीर ध्यानाकर्षण भएको उल्लेख गरेको छ । 
‘०८१ चैत १५ गते काठमाडौंमा भएको आन्दोलन–प्रदर्शनका क्रममा मानवीय क्षतिसँगै धनजनमा भएको आक्रमण निकै दुखद छ,’ विज्ञप्तिमा उल्लेख छ, ‘सर्वसाधारणको निजी जायजेथा, मिडिया हाउस, व्यावसायिक प्रतिष्ठानहरूको सम्पत्ति, कार्यालय र अन्य व्यापारिक गतिविधिमा आक्रमण, आगजनी, लुटपाटलगायतका हिंसक घटनाबाट ठुलो क्षति पुगेकोमा यसको भत्र्सना गर्दै क्षतिपूर्ति दिनुपर्ने महासंघको माग छ ।’ 

संविधानप्रदत्त अधिकारभित्र रहेर आफ्ना माग राख्न पाइए पनि हिंसक आन्दोलन एवं प्रदर्शनका साथै लुटपाट, आगजनी, धनजनको क्षति र व्यक्तिगत सम्पत्तिमाथिको आक्रमण निन्दनीय भएको महासंघको ठहर छ । ‘कुनै पनि स्वरूपमा हुने यस प्रकारका घटनाप्रति महासंघ घोर निन्दा र भत्र्सना गर्दछ,’ विज्ञप्तिमा उल्लेख छ, ‘साथै, महासंघ सार्वजनिक सुरक्षा सुनिश्चित गर्न र यस्ता घटनाहरूको पुनरावृत्ति रोक्न सम्बन्धित सबैमा आग्रह गर्दछ ।’