काठमाडौं । ४५६ मेगावाटको माथिल्लो तामाकोसी आज रातीदेखि पिकिङ मोडमा सञ्चालन गरिने भएको छ । मर्मत सम्भारपछि रन अफ दि रिभर प्रकृतिमा सञ्चालन हुँदै आएको आयोजना अर्ध(जलाशय (पिकिङ रन अफ दि रिभर) मा सञ्चालन गर्न लागिएको हो । शनिवार बिहान सात बजेदेखि आइतबार राति ८ बजेसम्म  स्काफोल्डिङ हटाउने, ग्राउटिङ गर्नेलगायतका काम गरिएको माथिल्लो तामाकोसी हाइड्रोपावरका प्रमुख कार्यकारी अधिकृत  मोहन गौतमले बताए । उनका अनुसार आजैबाट पिकिङ मोडलमा ४५६ मेगावाटसम्म उत्पादन हुन्छ । यसले बिहान बेलुकी प्राधिकरणलाई लोड व्यवस्थापनमा सहज हुने उनको भनाई छ । 

गत असोज ११ र १२ गतेको अविरल वर्षाका कारण आएको पहिरोले क्षति पुर्याएका संरचनाहरुको आंशिक मर्मतसम्भार गरी ८८ दिनपछि पुनः विद्युत् उत्पादन सुरु गएिको थियो ।   पानीको बहावलाई पूर्णरुपमा प्रयोग गरी १२० मेगावाट विद्युत् उत्पादन हुँदै आएको थियो ।