काठमाडौं । साना तथा मझौला कम्पनीलाई पूँजी बजारमा ल्याउने बाटो खुलेको छ । साना तथा मझौला लगानीकर्ताका लागि भनिएको ‘एसएमई प्लेटफर्म’ अघि बढेको छ । एसएमई प्लेटफर्मको नियमावली बिहीबारदेखि लागू भएपछि साना तथा मझौला संगठित संस्था (एसएमई) प्लेटफर्म बनाएर आइपीओ जारी गर्न पाउने व्यवस्था लागू भएको छ । नेपाल धितोपत्र बोर्डले साना तथा मझौला संगठित संस्थाको धितोपत्र निष्कासन तथा कारोबार नियमावली, २०८१ माघ ३ गतेबाट लागू हुने गरी जारी गरेको छ । बोर्डले नियमाबलीको आवश्यक कार्यान्वयनका लागि नेपाल स्टक एक्सचेञ्ज लिमिटेड तथा सीडीएस एन्ड क्लियरिङलाई समेत पत्राचार गरेको छ । यस्ता संस्थामा अधिकतम २५ करोड रुपियाँभन्दा बढी पुँजी हुन नपाउने व्यवस्था नियमाबलीमा छ । कम पुँजी भएका संस्थालाई पुँजी बजारमा बेग्लै प्रावधान राखेर भित्र्याउन लागिएको हो । यस्ता संस्थाले जारी गर्ने आइपीओमा कम्तिमा पनि पाँच सय कित्ताका लागि आवेदन दिनुपर्नेछ । आवेदकले निष्काशन गरिने सेयरमध्ये न्यूनतम पाँच सय कित्ता खरिदका लागि दरखास्त दिनुपर्छ भने सार्वजनिक निष्कासनको सेयर खरिद लागि दरखास्त दिन सकिने अधिकतम सीमा भने आइपीओ निष्काशनको विवरणपत्रमा उल्लेख भए बमोजिम हुने जारी नियमाबलीमा उल्लेख छ । एसएमई प्लेटफर्ममार्फत आइपीओ निष्काशन गर्ने कम्पनीहरुको सेयर बिक्री प्रबन्धक र योग्य संस्थागत लगानीकर्ताले पनि पाउने भएका छन् । साना तथा मझौला संगठित संस्थाको धितोपत्र निष्कासन तथा कारोबार नियमावली, २०८१ मा व्यवस्था छ । नियमाबलीअनुसार बिक्री प्रबन्धकसम्बन्धी कार्य गर्ने मर्चेन्ट बैंकरले पाँच प्रतिशत र योग्य संस्थागत लगानीकर्ताले १५ प्रतिशत सेयर खरिद गरेको हुनुपर्ने प्रावधान नियमाबलीमा छ । संगठित संस्थाले प्रारम्भिक सार्वजनिक निष्काशन गर्नुपूर्व पाँच प्रतिशत निष्काशन तथा बिक्री प्रबन्धसम्बन्धी कार्य गर्ने मर्चेन्ट बैंकरले र १५ प्रतिशत योग्य संस्थागत लगानीकर्ताले खरिद गरेको हुनुपर्ने नियमाबलीमा उल्लेख छ । योग्य संस्थागत लगानीकर्ताले तीन वर्षसम्म उक्त सेयर बिक्री गर्न नपाउने व्यवस्था छ ।