साझा अर्थ संवाददाता
२ असार २०८३, मङ्गलवार
काठमाडौं : इक्रा नेपाल लिमिटेडले अभियान लघुवित्त वित्तीय संस्था लिमिटेडको जारीकर्ता रेटिङ परिमार्जन गर्दै [आइसीआरएएनपी-आइआर] बी@ कायम गरेको छ। कम्पनीलाई ‘नकारात्मक प्रभाव निगरानी’ मा राखिएको छ भने ‘जारीकर्ता असहयोगी’ अर्थात् रेटिङ प्रक्रियामा आवश्यक सहकार्य नगरेको सूचीमा समेत समावेश गरिएको छ।
इक्रा नेपालका अनुसार यो रेटिङले संस्थाले वित्तीय दायित्व समयमै पूरा गर्ने क्षमतामा उच्च जोखिम रहेको संकेत गर्छ। रेटिङमा प्रयोग भएको ‘@’ चिन्ह ले संस्था अझै नकारात्मक निगरानीमा रहेको जनाउँछ। यसको अर्थ कम्पनीको वित्तीय अवस्थाबारे थप अनिश्चितता कायम रहेको हो।
‘जारीकर्ता असहयोगी’ भन्नाले रेटिङ निकायले आवश्यक सूचना, विवरण वा वित्तीय तथ्यांक माग्दा सम्बन्धित संस्थाबाट पर्याप्त सहयोग नपाएको अवस्थालाई जनाउँछ। यस्तो अवस्थामा रेटिङ निकायले उपलब्ध सीमित सूचना र आफ्नो मूल्याङ्कनका आधारमा रेटिङ निर्णय गर्छ।
यस कारण यो स्थिति लगानीकर्ता र सरोकारवालाका लागि थप संवेदनशील मानिन्छ। किनभने कम्पनीले आवश्यक विवरण समयमा उपलब्ध नगराउँदा संस्थाको वास्तविक वित्तीय अवस्था बुझ्न कठिन हुन्छ।
आइक्रा नेपालले अभियान लघुवित्तको रेटिङमा ‘फिर्ता सम्बन्धी सूचना’ समेत उल्लेख गरेको छ। यसको अर्थ रेटिङ प्रक्रिया वा रेटिङ कायम राख्ने विषयमा थप कदम अघि बढ्न सक्ने संकेत हो। यद्यपि, यस्तो सूचना आफैंमा कम्पनी बन्द हुने वा कारोबार रोकिने निर्णय भने होइन।
[आइसीआरएएनपी-आइआर] बी@ रेटिङले कम्पनीमा जोखिम उच्च रहेको संकेत गर्छ। यो कुनै निश्चित धितोपत्र किन्न वा बेच्न सिफारिस होइन, बरु संस्थाको समग्र वित्तीय विश्वसनीयताबारे रेटिङ निकायको राय हो।
लघुवित्त क्षेत्रमा पछिल्ला वर्षहरूमा निष्क्रिय कर्जा, असुली दबाब, सञ्चालन खर्च र नियामकीय चुनौती बढ्दै गएको अवस्थामा यस्तो रेटिङले लगानीकर्तालाई कम्पनीको वित्तीय अवस्था, कर्जा गुणस्तर, पुँजी पर्याप्तता र व्यवस्थापन पारदर्शिताबारे थप सतर्क हुनुपर्ने संकेत गर्छ।
आइक्रा नेपालले स्पष्ट पारेअनुसार जारीकर्ता रेटिङ कुनै विशेष वित्तीय साधनका लागि नभई संस्थाको समग्र ऋण भुक्तानी क्षमतासम्बन्धी राय हो। रेटिङ चिन्हमा प्रयोग हुने ‘प्लस’ वा ‘माइनस’ ले एउटै वर्गभित्रको तुलनात्मक रूपमा बलियो वा कमजोर अवस्थालाई देखाउँछ।
