नबिल बैंकको उद्यमशीलतासम्बन्धी कार्यक्रम ‘नबिल स्कुल अफ सोसियल आन्टरप्रेनरसिप (नबिल एसएसई)’ सञ्चालन गरेको छ । नबिल एसएसई बैंकको संस्थागत सामाजिक उत्तरदायित्वअन्तर्गत सामाजिक उद्यमशीलताको विकासमार्फत सामाजिक रूपान्तरण गर्ने लक्ष्य राखेर अघि बढाइएको कार्यक्रम हो ।

समाजमा सकारात्मक परिवर्तन ल्याउन नबिलले फेलोसिप कार्यक्रम र सर्टिफिकेट कोर्स गरी दुई प्रकारको कार्यक्रम सञ्चालन गर्दै आएको छ । हालसम्म नबिल एसएसई कार्यक्रमबाट एक हजार दुई सय रोजगारी सिर्जना भएको तथा ७२ व्यवसाय सञ्चालनमा आएका बैंकले जनाएको छ ।

हालसम्म ५६ जना फेलोले फेलोसिप कार्यक्रममा सहभागिता जनाइसकेका छन् । २० फेलोहरू सुरुवाती चरणमा छन् भने ४५ व्यवसाय स्थापना भएर करिब एक हजार दुई सय जनाले रोजगारी पाइरहेका छन् । त्यस्तै, सर्टिफिकेट कोर्सअन्तर्गत पाँच सय १८ जनाले यो कोर्स पूरा गरिसकेका छन् भने दुई सय २६ जना नयाँ भर्ना भएका छन् । नबिल बैंकले यो फेलोसिप कार्यक्रमका लागि त्रिभुवन विश्वविद्यालयको व्यवस्थापन संकायसँग साझेदारी गरेको छ । यो ६ महिना लामो कार्यक्रम हो, जसमा प्रत्येक महिनाको तीन दिन आवासी तालिमको व्यवस्था छ । 

तालिममा प्रत्येक सहभागीलाई वर्षभरिका लागि एकजना मेन्टरको व्यवस्था गरिएको छ । कार्यक्रममा सहभागीहरूले आफ्नो उद्यमको प्रकृतिअनुसार विज्ञहरूको सहयोगमा व्यावहारिक चुनौतीको समाधानका लागि आवश्यक सहयोग प्राप्त गर्नेछन् । 

यो कार्यक्रमका लागि नबिल बैंकले सात प्रदेशका विभिन्न शैक्षिक संस्थासँग साझेदारी गरिरहेको छ । तीन महिना लामो यो कोर्समा सहभागीहरूले उद्यमशील बन्नका लागि व्यावहारिक सीप र ज्ञान प्राप्त गर्नेछन् । यस्तो कार्स सम्पन्न गरिसकेपछि सहभागीले उद्यमशीलता विकास गर्नुका साथै बैंकमा पेस गर्न मिल्ने व्यावसायिक योजना पनि बनाउन सक्ने बैंकले जनाएको छ ।