साझा अर्थ संवाददाता
१५ असार २०८३, सोमवार
काठमाडौँ, १५ असार: नेपाली सुनचाँदी बजारमा सोमबार सुनको मूल्यमा उल्लेख्य गिरावट आएको छ। नेपाल सुनचाँदी व्यवसायी महासंघका अनुसार छापावाल सुनको मूल्य तोलामा १ हजार ४ सय रुपैयाँले घटेर प्रतितोला २ लाख ८२ हजार ४ सय रुपैयाँ कायम भएको छ। यसअघि आइतबार छापावाल सुन प्रतितोला २ लाख ८३ हजार ८ सय रुपैयाँमा कारोबार भएको थियो।
बजारमा तेजाबी सुनको मूल्यमा पनि सोही अनुपातमा गिरावट आएको छ। अघिल्लो दिन प्रतितोला २ लाख ८३ हजार १ सय रुपैयाँमा खरिदबिक्री भएको तेजाबी सुन सोमबार तोलामा १ हजार ४ सय रुपैयाँले घटेर २ लाख ८१ हजार ७ सय रुपैयाँमा झरेको महासंघले जनाएको छ।
सुनसँगै चाँदीको मूल्यमा पनि सामान्य गिरावट आएको छ। आइतबारको तुलनामा चाँदी तोलामा १५ रुपैयाँले सस्तिएर प्रतितोला ४ हजार ३ सय १० रुपैयाँ कायम भएको छ। अघिल्लो दिन चाँदी प्रतितोला ४ हजार ३ सय २५ रुपैयाँमा कारोबार भएको थियो। अन्तराष्ट्रिय बजारमा हुने उतारचढावकै कारण स्थानीय बजारमा मूल्य समायोजन भएको व्यवसायीहरूले बताएका छन्।
