तेहरान, ९ असारः ईरानले होर्मुज जलडमरूमध्यको व्यवस्थापन युद्धपूर्व अवस्थामा कहिल्यै नफर्किने स्पष्ट पारेको छ। ईरानका मुख्य वार्ताकार तथा संसद अध्यक्ष मोहम्मद बाकर गालिबाफले स्विट्जरल्यान्डमा अमेरिकासँगको वार्तापछि फर्किँदै यो अहम समुद्री मार्गको नियन्त्रण तेहरानले आफ्नै सर्तमा गर्ने बताएका हुन्।

गालिबाफले भने, "युद्धको प्रारम्भमै मैले स्पष्ट भनेको थिएँ कि होर्मुज जलडमरूमध्यको प्रबन्धन कहिल्यै युद्धपूर्व जस्तो हुँदैन।" उनले कूटनीतिक प्रयासबाट अमेरिकी नाकाबन्दी हटाउन सफल भएकोमा ईरानी वार्ताकारहरूको प्रशंसा गर्दै भने, "यदि हामीले यो सैन्य माध्यमबाट गर्न चाहेको भए युद्ध हुन्थ्यो र ठूलो क्षति हुन्थ्यो, तर तपाईंले देख्नुभयो नाकाबन्दी रातारात हट्यो।"

उनले वाशिङ्टनप्रति पुरानो अविश्वास दोहोर्याउँदै ईरानले कहिल्यै अमेरिकीमाथि भरोसा नगरेको र नगर्ने बताए। साथै, ईरान अमेरिकासँग भविष्यको कुनै पनि कारोबारमा अत्यन्त सतर्कता अपनाउने पनि उनको भनाइ छ।

होर्मुज जलडमरूमध्यमा आवतजावत गर्ने जहाजहरूको सुरक्षा तथा सम्भावित गलतफहमीको समाधानका लागि ईरान र अमेरिकाबीच टेलिफोन हटलाइन स्थापना गर्ने सहमति भएको गालिबाफले जानकारी दिए। उनका अनुसार समन्वय केन्द्रसमेत स्थापना गरिनेछ, जसले जहाज र अमेरिकाबीच हुनसक्ने कुनै पनि अस्पष्टता तथा आपत्तिहरूको समाधान गर्नेछ।

"यदि अमेरिकीलाई कुनै कुरामा आपत्ति छ वा कुनै जहाजलाई मार्गबारे स्पष्ट जानकारी चाहियो भने उनीहरूले त्यस केन्द्रमा सम्पर्क गर्न सक्छन्," गालिबाफले हटलाइनको उद्देश्यबारे बताए। यस पहलले होर्मुज क्षेत्रमा बढ्दो तनावलाई कम गर्न मद्दत गर्ने विश्वास व्यक्त गरिएको छ।