काठमाडौँ, ०६ जेठ: टक्सार पिखुवा खोला हाइड्रोपावर लिमिटेडको प्राथमिक सेयर आज ०६ जेठ २०८३ मा बिक्री प्रबन्धक प्रभु क्यापिटलको कार्यालयमा बाँडफाँड गरिएको छ। गोलाप्रथामार्फत कुल २ लाख ५१ हजार ५ सय ४५ जना आवेदकले १० कित्ताका दरले सेयर पाएका छन्। तीमध्ये भाग्यमानी ५ जनाले थप १/१ कित्ता (कुल ११ कित्ता) सेयर हात पारेका छन्।

कम्पनीले सर्वसाधारणका लागि कुल २५ लाख १५ हजार ४ सय ५५ कित्ता सेयर निष्कासन गरेको थियो। यसमा २६ लाख ४ हजार ९ सय १० जना आवेदकबाट २ करोड ८८ लाख ११ हजार ९ सय ८० कित्ताका लागि आवेदन परेको थियो, जुन मागभन्दा ११ दशमलव ४५ गुणा बढी हो। मागभन्दा अत्याधिक आवेदन परेका कारण २३ लाख ५३ हजारभन्दा बढी लगानीकर्ताको हात खाली भएको छ।